၅ နှစ်ဆက် ပျက်ကွက်ခဲ့တဲ့ ဆုပေးပွဲအခမ်းအနားကို အသင်းဖော်ဟောင်းကြောင့် တက်ရောက်မယ့် ရော်နယ်ဒို

Posted on

ခရစ်စတီယာနိုရော်နယ်ဒိုဟာ လာမဲ့တနင်္လာနေ့မှာ ပြင်သစ်နိုင်ငံ၊ ပဲရစ်မြို့၌ ကျင်းပမဲ့ Ballon D’or ဆုပေးပွဲအခမ်းအနားကို တက်ရောက်မှာဖြစ်တယ်လို့ နိုင်ငံတကာ သတင်းတွေအရ သိရပါတယ်။အသက် ၃၇ နှစ်အရွယ်ရှိ ရော်နယ်ဒိုဟာ ၂၀၁၇ က ဘောလွန်းဒီအောဆုကို နောက်ဆုံး ရရှိပြီးနောက်ပိုင်း ဒီဆုပေးပွဲကို တက်ရောက်ခြင်း မရှိတော့တာပါ။

Ballon D’or ဆု ၅ ကြိမ်ဆွတ်ခူးထားတဲ့ ပေါ်တူဂီတိုက်စစ်မှူးဟာ Ballon D’or ဆုပေးပွဲအခမ်းအနားကို နောက်ဆုံးတက်ရောက်ခဲ့တဲ့နှစ်ကတော့ ၂၀၁၇ ခုနှစ်ဖြစ်ပါတယ်၊ အဆိုပါ ၂၀၁၇ ခုနှစ် Ballon D’or ဆုရှင်ကလဲ သူကိုယ်တိုင်ဖြစ်ပြီး၊ ၂၀၁၇ ခုနှစ်နောက်ပိုင်းကျင်းပတဲ့ ၂၀၁၈ ခုနှစ်၊ ၂၀၁၉ ခုနှစ်၊ ၂၀၂၁ ခုနှစ် ဆုပေးပွဲတွေကို တက်ရောက်အားပေးခြင်းမရှိဘဲ ၅ နှစ်တိတိ အဆိုပါ အခမ်းအနားနဲ့ ကင်းကွာနေတာဖြစ်ပါတယ်။

ပြီးခဲ့တဲ့ရာသီက ယူနိုက်တက်အတွက် ၂၄ ဂိုး သွင်းယူခဲ့တဲ့ ရော်နယ်ဒိုဟာ အခုနှစ် ကျင်းပမယ့် ဆုပေးပွဲရဲ့ ဆန်ကာတင်စာရင်းမှာ ပါဝင်နေတာ ဖြစ်ပါတယ်။ ရော်နယ်ဒိုဟာ ဒီဆုကိုရယူနိုင်ဖို့ ဖြစ်နိုင်ဖွယ်မရှိဘဲ ရီးရယ်လ် အသင်းတိုက်စစ်မှူး ဘန်ဇီမာက ဆုရရှိဖို့ ရေပန်းအစားဆုံးအဖြစ် ရှိနေတာပါ။

ဘန်ဇီမာဟာ ပြီးခဲ့တဲ့ရာသီက ရီးရယ်လ်အသင်းအတွက် ပြိုင်ပွဲစုံ ၄၆ ပွဲမှာ ၄၄ ဂိုး သွင်းယူပြီး အသင်းကို လာလီဂါ နဲ့ ချန်ပီယံလိဂ် ဆုဖလား ရယူနိုင်အောင် စွမ်းဆောင်ပေးနိုင်ခဲ့တာ ဖြစ်ပါတယ်။

ရော်နယ်ဒိုနဲ့ ဘန်ဇီမာတို့ဟာ ဘာနေဗျူးမှာ ၉ နှစ်ကြာ တွဲကစားခဲ့ပြီး အဆိုပါအချိန်တွေမှာ အရင်းနှီးဆုံး မိတ်ဆွေ တွေအဖြစ် ရှိခဲ့တာပါ။ ရော်နယ်ဒို ကိုယ်တိုင်ကလည်း အခုနှစ်အတွက် ဘောလွန်းဒီအောဆုကို ဘန်ဇီမာ ရရှိမယ် လို့ ယုံကြည်မှုရှိနေတာ ဖြစ်ပါတယ်။
ရော်နယ်ဒိုဟာ ပြီးခဲ့တဲ့ ၂၀၁၈၊ ၂၀၁၉ နဲ့ ၂၀၂၁ က ကျင်းပခဲ့တဲ့ ဆုပေးပွဲမှာ ဆုရရှိနိုင်မှာ မဟုတ်မှန်းသိလို့ တက်ရောက်ခဲ့ခြင်း မရှိပါဘူး။ ဒါပေမယ့် အခုနှစ်မှာ ကျင်းပမယ့် ဆုပေးပွဲမှာတော့ အသင်းဖော်ဟောင်း ဘန်ဇီမာကို ဂုဏ်ပြုချင်လို့ တက်ရောက်မယ်လို့ နိုင်ငံတကာ သတင်းတွေက ဖော်ပြထားကြပါတယ်။

ပြီးခဲ့တဲ့နှစ်က ဘောလွန်းဒီအောဆုကို ရယူနိုင်ခဲ့တဲ့ မက်ဆီကတော့ အခုနှစ်အတွက် ဆန်ကာတင်စာရင်းမှာ ပါဝင်ခဲ့ခြင်း မရှိပါဘူး။အာဂျင်တီးနား အသင်းခေါင်းဆောင်ဟာ ပီအက်စ်ဂျီအသင်းနဲ့ ပထမရာသီမှာ ခြေစွမ်းပြနိုင်ဖို့ ခက်ခဲနေတာကြောင့် ဆန်ကာတင်စာရင်းမှာ ရွေးချယ်ခြင်း မခံခဲ့ရတာ ဖြစ်ပါတယ်။